Kanguva OTT Release: சூர்யாவின் கங்குவா திரைப்படம் ஓ.டி.டி.-யில் எப்போது ரிலீஸ் தெரியுமா?

சூர்யா நடிப்பில் வெளிவந்துள்ள ‘கங்குவா’ திரைப்படம் ஓ.டி.டி-யில் எப்போது வெளியாகும் என்பது குறித்த தகவல்கள் வெளிவந்துள்ளன. ஸ்டுடியோ கிரீன் கே. இ. ஞானவேல் ராஜா தயாரிப்பில், இயக்குனர் சிவா இயக்கத்தில், சூர்யா முன்னணி கேரக்டரில் நடித்துள்ள ‘கங்குவா’ திரைப்படம் கடந்த வியாழன் அன்று வெளியாகி திரையரங்குகளில் ஓடிக்கொண்டிருக்கிறது.

மிகப்பெரும் எதிர்பார்ப்புக்கு மத்தியில் வெளியான இந்த திரைப்படத்திற்கு கலவை விமர்சனங்கள் வந்து கொண்டிருக்கின்றன. 11ம் நூற்றாண்டு மற்றும் தற்காலத்தில் நடக்கும் சம்பவங்களாக ‘கங்குவா’ படத்தில் காட்சிகள் இடம் பெற்றுள்ளன.

இந்த படத்தில் சூர்யாவுடன் யோகி பாபு, திஷா பதானி, பாபி தியோல், கருணாஸ், நட்டி, போஸ் வெங்கட் உள்ளிட்ட பலர் நடித்துள்ளனர். தேவி ஸ்ரீ பிரசாத் இந்த படத்திற்கு இசையமைத்துள்ளார்.

உலகம் முழுவதும் 3டி தொழில்நுட்பத்துடன் ‘கங்குவா’ திரைப்படம் வெளியிடப்பட்டுள்ளது. கலவை விமர்சனங்கள் வெளிவந்த போதிலும் ‘கங்குவா’ திரைப்படம் தொடர்ந்து வசூலை குவித்து வருவதாக தகவல்கள் தெரிவிக்கின்றன.

படம் வெளியான முதல் நாளில் மட்டும் இந்த திரைப்படம் 56 கோடி ரூபாய்க்கும் அதிகமாக வசூலித்துள்ளது. இது சூர்யாவின் கெரியரில் அவருக்கு கிடைத்துள்ள மிகப்பெரிய ஓபனிங் என்பது கவனிக்கத்தக்கது. இந்நிலையில் ‘கங்குவா’ படத்துடைய ஓ.டி.டி. ரிலீஸ் குறித்து தகவல்கள் வெளிவந்துள்ளன.

இந்த படத்தை அமேசான் ப்ரைம் ஓடிடி தளம் சுமார் 100 கோடி ரூபாய்க்கு வாங்கி உள்ளதாக கூறப்படுகிறது. திரையரங்குகளில் நவம்பர் 14ஆம் தேதி ‘கங்குவா’ வெளியான நிலையில் ஓடிடியில் பொங்கலையொட்டி இந்த திரைப்படம் ஜனவரி 10ஆம் தேதி வெளியாகலாம் என்று கூறப்படுகிறது.